IAML Vienna Conference Diary / Konferenztagebuch #7: Deutschschweiz (Switzerland / Schweiz / Suisse / Svizzera)

Exkursion in Wien

 

Wi jede Midwuch i-n-ere IAML-Konferänz hei mer ou das Mou zwüsche verschidene Exkursione chönne wähle. Deu i dr Stadt z’Fuess und deu usserhaub mid-em Bus. I ha mi entschide, Wien z’erkunde uf de Schpure vom „Fin de Siècle“.

Grad z’ersch hed üsi Füerere Bezug gno uf-e Veraschtautigsort: das isch früecher ´s augemeine Schpitau gsy und um 1900 isch Wien würklech füerend gsy i dr Medizin. Nächhär hei mer e Blick gworfe uf das Sanatorium, wo dr Mahler drin g’schtorbe-n-isch. Vo dört sy mer mid-em Dram bis zu dr Schtaatsopere gfahre, und unger de-n-Arkade hei mer e Huffe g’hört über-e Mahler und sini Zyt a däm Huus.

Üse Wäg hed is de zur „Secession“ g’füert, däm Museum für nöii Kunscht, wo ou i dere Zyt isch bout worde für di sogenannte Secessionischte, wo denn e nöii Kunscht hei i d‘ Wäg gleitet. I däm Museum isch e Ruum schpezieu yggrichtet worde für-e Beethoven-Fries vom Guschtav Klimt, wo-n-er e Darschteuig vo dr Wagner’sche Interpretation vo dr 9te Beethoven g’schaffe het.

Nach-e-me-ne Blick uf ´s Theater a dr Wien, wo dr Beethoven mou g’wohnt het und e-me Schpaziergang dür-e Naschmarkt hei mer no d‘ Jugendschtiu-Hüser und e Bahnstation vom Otto Wagner aaggluegt. Är isch um 1900 Schtadtboumeischter gsy und hed ou d’Iideckig vo dr Wien und d‘ Schtadtbahn blanet.

Di nöchschti Schtation isch d‘ Karls-Chüeche gsy, wo üsi Füerere uusfüerlech verzeut het über d’Hochzyt vom Guschtav und dr Alma Mahler, wo dört schtattgfunge het – und ou über ´s Läbe vo dr Alma näbem Guschtav und nach ihm. Mit Blick uf’s Arnold Schönbärg-Center vom Schwarzebärg-Blatz uus sy mer de no uf d’Beziehig vom Schönbärg zum Mahler und uf‘s Drüegg Schönbärg, sini Frou und em Richard Gerschtl z’schpräche cho.

Dr Chreis hed sech g’schlosse a dr Auenbruggergass, wo mer ‘s Huus gseh hei, wo dr Mahler vo 1898 bis 1909 gläbt het.

So hei mer – mid Schwärgwicht uf em Mahler sym Läbe – e schöne-n-Überblick übercho vo dere Zyt um 1900 in Wien.

 

Jürg Obrecht, Orchester der Tonhalle Zürich, Schweiz

Translate

English French German Italian Portuguese Russian Spanish